MeteoSIX nace en decembro de 2009 coordinado por MeteoGalicia e coa participación do Grupo de Arquitectura de Computadores da UDC, o Laboratorio de Sistemas da USC e o CESGA. Os seus obxectivos son dotar a MeteoGalicia dun Sistema de Información Xeográfica (SIX) para o acceso a datos meteorolóxicos e proporcionar canles de acceso á información axeitadas ao maior número posible de usuarios.

Os produtos xurdidos no marco deste proxecto foron un sistema de acceso xeorreferenciado á predición numérica, tanto meteorolóxica como oceanográfica, API do MeteoSIX, e unha aplicación para dispositivos móbiles, MeteoSIX Mobile, que permitía a personalización do acceso a ditas predicións. Así, os usuarios podían confeccionar dende o seus dispositivos móbiles predicións para calquera lugar de Galicia á medida das súas necesidades.

MeteoSIX Mobile está dispoñible de balde para o sistema operativo Android e para iOS (iPhone) en tres idiomas (galego, castelán e inglés) e deixarára de estar operativa definitivamente a finais do ano 2021. A derradeira versión publicada do proxecto é a 2.2.1.

Desde mediados do ano 2021, concretamente a partir da versión 4.3.0, a APP de MeteoGalicia incorporará todas as funcionalidades da APP MeteoSIX nun novo apartado, no que o usuario poderá:

* Obter a predición para calquera punto do sudoeste de Europa e da súa costa de tres modos:

• - Usando a posición actual do dispositivo
• - Seleccionando o punto de interese sobre o mapa
• - Facendo unha busca polo nome do lugar. Actualmente pódense buscar entidades de poboación e praias de Galicia.

* Gardar lugares favoritos, para poder así acceder á súa predición de forma directa. Ademais, os usuarios poden elixir entre ver a predición diaria resumida ou unha predición estendida con datos horarios e poden seleccionar un gran número de variables: temperatura, estado do ceo, vento, temperatura da auga, altura de onda, etc.

Cómpre aclarar a orixe das previsións amosadas neste apartado MeteoSIX: Son xeradas automaticamente a partir dos resultados dos modelos numéricos e deben ser interpretadas como tendencias probables de evolución do tempo. Os cálculos necesarios para levar a cabo estas predicións numéricas realízanse diariamente nos servidores do Centro de Supercomputación de Galicia (CESGA).

        

A API do MeteoSIX é un servizo web que da acceso aos resultados dos distintos modelos de predición numérica executados diariamente por MeteoGalicia. Ademais, permite obter información sobre as mareas e sobre as horas de saída e posta do sol.

O obxectivo desta API é facilitar a consulta da grande cantidade de información de predición meteorolóxica e oceanográfica existente presentándoa dun xeito estruturado e ordenado. A API pode ser útil tanto para aqueles que desexen desenvolver aplicacións meteorolóxicas a medida usando estes datos, como para usuarios finais que precisen a información para distintos tipos de análises e procesamentos.

As variables de predición numérica que se poden consultar a través da API son as seguintes:

A principios do ano 2021 publicouse unha nova versión desta API, a v4. É aconsellable consultar o Manual de usuario da API  antes de utilizala. Neste documento descríbese o seu funcionamento con exemplos incluídos.

A API é pública e o seu uso é de balde. Unicamente debe solicitarse unha clave de usuario enviando a petición ao enderezo electrónico administracion-web.meteogalicia@xunta.gal.

Esta clave quedará ligada ao enderezo electrónico co que se envía a solicitude e debe ser incluída en todas as peticións que se fagan.